МОНГОЛ ЭРДЭМТДИЙН “ИННОВАЦИЙН БҮТЭЭГДЭХҮҮНИЙ
ҮЗЭСГЭЛЭНГИЙН ТАНХИМ”-ЫН ТАНИЛЦУУЛГА

БСШУС-ын Сайдын 2017 оны А/146 тушаалаар: үйлдвэрлэлд үйлчилгээнд нэвтэрсэн судалгаа, боловсруулалтын ажлын үр дүн, инновацийн бүтээгдэхүүнийг сурталчлах, түгээн дэлгэрүүлэх үйлчилгээ үзүүлэх зорилготой байгуулагдсан.

Монгол эрдэмтдийн “Инновацийн бүтээгдэхүүний үзэсгэлэнгийн танхим” нь Улаанбаатар хотын төвд байрлах Мэдээлэл, технологийн үндэсний паркийн 3 давхарт үйл ажиллагаа явуулж байгаа бөгөөд 57 м2 тохилог талбайд шинжлэх ухаанд дуртай хүн бүхэнд шинжлэх ухааны бүхий л салбараар загвар бүтээгдэхүүнийг /үнэ/ төлбөргүй толилуулж байхаар үүд хаалгаа нээсэн.

Үзэсгэлэнгийн танхим нь 2018 оны 3 сард үйл ажиллагааны нээлтээ хийж олон нийтэд үйлчилж эхэлсэн. 2021 оны байдлаар 7 Их дээд сургууль, түүний дэргэдэх 15 эрдэм шинжилгээний хүрээлэн, 14 гарааны компанийн 88 судалгаа боловсруулалтын ажлын үр дүн бий болсон 150, гарааны компани, хүрээлэнгүүдийн нэрийн 57 бүтээлээр баяжигдсан.

ШУТСангийн хамт олон бид танхимыг түшиглэн улсын төсвийн санхүүжилтээр хийгдсэн судалгаа шинжилгээний үр дүнд бий болсон инновацийн бүтээгдэхүүнийг олон нийтэд сурталчлан таниулах, түгээн дэлгэрүүлэх, эдийн засгийн эргэлтэд оруулахад дэмжлэг үзүүлэн ажиллаж байна.

Тус танхим нь байнгын нээлттэй ажилласнаар иргэд шинжлэх ухаан, технологийн салбарт гарч буй сүүлийн үеийн төслүүдийн үр дүн, бүтээлтэй цаг алдалгүй, биетээр танилцаж, сонирхсон загвар бүтээгдэхүүндээ хөрөнгө оруулж, зах зээлд нэвтрүүлэхэд бид эрдэмтэн, судлаачидтай холбох гүүр болж ажиллана.

Танхимд нэмэгдсэн загвар бүтээгдэхүүний талаар дэлгэрэнгүй мэдээлэл авахыг хүсвэл www.stf.mn веб сайтын фото мэдээний цэснээс төслийн үр дүнгийн талаар мэдээлэл үзэх боломжтой.

Шинжлэх ухаан технологийн сангийн хамт олон бид 2021 онд:

• Монгол эрдэмтдийн “Инновацийн бүтээгдэхүүнийг үзэсгэлэнгийн танхим”-ыг хүссэн газраасаа үзэх боломжтой 360 виртуал үзэсгэлэн болгох,
• Судалгаа боловсруулалтын үр дүнд гарсан загвар бүтээгдэхүүн болон эрдэм шинжилгээний хүрээлэнгүүдийн нэрийн бүтээгдэхүүний танилцуулгыг англи, монгол хэлээр гаргахаар зорилт тавин ажиллаж байна.

Манай танхимд шинжлэх ухааны чиглэлээр 10-20 хүний багтаамжтай үйл ажиллагаа зохион байгуулах боломжийг санал болгож байна.

• Шинэ бүтээгдэхүүн танилцуулга, үзэсгэлэн худалдаа,
• Шинжлэх ухаан сонирхогч оюутан, залуучуудад зориулсан сургалт.